Қазақстанның Ұлттық төлем корпорациясы 29–30 қыркүйек күндері Астанада өткен KazHackStan 2026 халықаралық киберқауіпсіздік конференциясына қатысты. Конференция алаңында «ҰТК» АҚ қашықтан сәйкестендіру қауіпсіздігін арттыруға және пайдаланушыларды заманауи цифрлық қатерлерден қорғауға бағытталған технологиялар мен практикалық құралдарды таныстырды.

Корпорация экспозициясының негізгі бағыттарының бірі биометриялық шешімдерді сынақтан өткізу болды. Конференция қатысушылары Сәйкестендіру деректерін алмасу орталығының (СДАО) биометриялық аутентификация сервистерімен танысып, оларды СДАО платформасына қосу алдында қалай тестілеуден өткізілетінін көрді.

Мұндай тестілеу биометриялық алгоритмдердің сенімділігін және олардың тұлғаны алмастыру әрекеттеріне төзімділігін бағалауға мүмкіндік береді. Атап айтқанда, стендте liveness-тексерулері кезінде биометриялық шешімдердің тұлғаны алмастыру әрекеттерін анықтау қабілетін тексеруге қолданылатын шынайы силиконнан жасалған маска көрсетілді.

Сонымен қатар цифрлық қатерлердің өзекті бағыттарының бірі – жасанды интеллект көмегімен жасалған синтетикалық фото және бейнематериалдарды пайдалану мәселесіне ерекше назар аударылды. Қатысушыларға заманауи дипфейк жасау құралдарының мүмкіндіктері көрсетіліп, шынайы және жасанды жолмен жасалған кескіндердің қайсысы екенін анықтау, сондай-ақ екі фотосуреттің бір адамға тиесілі екенін белгілеу ұсынылды.

Бағдарламаның практикалық бөлігі «ҰТК: Сенім коды» интерактивті квесті аясында жалғасты. Квестке қатысушылар алаяқтық схемаларды тануды, қандай жеке және қаржылық деректерді үшінші тұлғаларға беруге болмайтынын анықтауды, сондай-ақ шынайы бейнематериалдарды дипфейктерден ажыратуды үйренді.

Екі күн ішінде «ҰТК» АҚ стендіне 500-ден астам адам келді. Интерактивті квестке 220 қатысушы тіркелді, олардың кейбірі тапсырмаларды бірнеше рет орындады. Қонақтардың ерекше қызығушылығын силикон маскасының көрсетілімі мен дипфейктерді анықтауға арналған тапсырмалар тудырды.

«ҰТК» АҚ стендіне ҚР Премьер-министрінің орынбасары – Жасанды интеллект және цифрлық даму министрі Жаслан Мәдиев, мемлекеттік органдардың өкілдері, кәсіби және сарапшылық қауымдастық мүшелері, технологиялық компаниялардың өкілдері, сондай-ақ студенттер мен конференция қонақтары келді.

Интерактивті формат биометриялық қауіпсіздік және цифрлық қатерлерден қорғау саласындағы заманауи технологиялардың мүмкіндіктерін көрнекі түрде көрсетуге мүмкіндік берді. Кескіндер мен бейнематериалдар генерациялау құралдарының дамуына байланысты биометриялық аутентификацияның сенімділігі және оның тұлғаны алмастыру әрекеттеріне төзімділігі ерекше маңызға ие болып отыр.

KazHackStan 2026 конференциясына қатысу «ҰТК» АҚ-ға қауіпсіз қашықтан сәйкестендіру тәсілдерін кең аудиторияға таныстыруға және заманауи технологиялардың цифрлық қаржы сервистерін пайдаланушыларды қалай қорғайтынын көрсетуге жол ашты.

Антифрод-орталығының жұмысы арқылы 127 миллиард теңге көлеміндегі алаяқтық әрекеттердің жолы кесілді

Алматыда өткен Central Asia Fintech Summit 2026 аясында National Antifraud Awards 2026 марапаттау рәсімі өтті. Шарада еліміздегі қаржылық қауіпсіздікті нығайтуға және алаяқтыққа қарсы күреске айтарлықтай үлес қосқан қаржы ұйымдары мен полиция бөлімшелері арнайы марапатталды.

Марапаттар ұрланған қаражатты қайтару көрсеткіштері, банктер мен құқық қорғау органдарының үйлесімді жұмысы, қаржылық сауаттылықты арттыру, сондай-ақ Ұлттық антифрод-орталығының қызметін жетілдіруге қосқан үлесі үшін табысталды.

Басты номинациялардың бірі — «Жыл қайтарымы» алаяқтық құрбаны болған азаматтардың қаражатын қайтаруда озық нәтиже көрсеткен құқық қорғау органдарына берілді. Бұл санатта Жетісу, Түркістан және Қызылорда облыстарының полиция департаменттері финалист атанса, Түркістан облысының Полиция департаменті үздік деп танылды.

Құқық қорғау органдары арасындағы «Сенімді серіктес» номинациясы алаяқтық оқиғаларын тексеру кезінде қаржы нарығына қатысушылармен ең тиімді әріптестік орнатқан бөлімшелерге берілді. Бұл санатта Астана, Алматы қалалары мен Атырау облысының полиция департаменттері финалист атанып, Астана қаласының Полиция департаменті жеңімпаз атанды.

Алматы қаласының Полиция департаменті «Қаржылық қауіпсіздік мәдениетін дамытуға қосқан үлесі үшін» марапатына ие болды. Бұл номинация азаматтардың қаржылық алаяқтық пен цифрлық қауіпсіздік туралы хабардарлығын арттыру бағытындағы жұмыстарды бағалайды. 2025 жылы Антифрод-орталық банктермен және құқық қорғау органдарының қызметкерлерімен бірлесіп студенттерге арналған «Цифрлық ортадағы қаржылық қауіпсіздік» атты оқыту семинарларын өткізген болатын. Бұл номинацияның финалистері қатарында Астана қаласы мен Қарағанды облысының полиция департаменттері де болды.

Antifraud Awards марапатының арнайы бөлімі күдікті операцияларды анықтауға, алаяқтықтың алдын алуға және зардап шеккендерге қаражатты қайтаруға күн сайын атсалысып жүрген қаржы ұйымдарына арналды.

Freedom Bank қаржылық алаяқтыққа қарсы іс-қимылға және антифрод өзара іс-қимылын дамытуға қосқан елеулі үлесі үшін  «Жылдың Антифрод-серіктесі» атағын иеленді. Бұл номинацияда сондай-ақ Kaspi Bank пен Home Credit Bank үздік үштікке еніп, финалист атанды.

Құқық қорғау органдары өкілдерінің бағалауы бойынша, Kaspi Bank өзара іс-қимылдың тиімділігі, ашықтығы және серіктестіктің жоғары деңгейі үшін «Сенімді серіктес» деп танылды. Бұл санатта Freedom Bank пен Home Credit Bank те финалистер қатарынан көрінді.

Қаржы институттары арасында «Қаржылық қауіпсіздік мәдениетін дамытуға қосқан үлесі үшін» марапатын Halyk Bank иеленді. Банк құқық қорғау органдарының қызметкерлерімен бірлесіп, студенттермен ауқымды білім беру жұмысына қатысты: бұл бастамаға банктің филиалдар желісі тартылып, соның арқасында мыңдаған жастар қаржылық қауіпсіздік бойынша оқудан өтті. Осы номинациядағы жеңімпаз атағы үшін Bereke Bank пен Freedom Bank та бәсекелесті.

«Антифрод-орталығын дамытуға қосқан үлесі үшін» арнайы марапаттарымен WhyHappen, Еуразиялық банк, Bereke Bank және Freedom Bank марапатталды. Аталған ұйымдар алаяқтықты анықтау мен оның алдын алудың жаңа тетіктерін жетілдіруге бағытталған «Сессиялық антифрод» пилоттық жобасына қатысты.

«Қаржылық алаяқтыққа қарсы тиімді күрес жүйелі тәсілді, атап айтқанда ортақ инфрақұрылымды, деректермен жедел алмасуды және барлық тараптың үйлесімді әрекетін талап етеді. Екі жыл ішінде Ұлттық Антифрод-орталығы 270-тен астам ұйымды біріктіріп, осындай өзара іс-қимыл алаңына айналды. Алдағы міндет – тәуекелдерді ерте сатыда анықтап, азаматтарға материалдық залал келтірілмей тұрып алаяқтық операциялардың жолын кесетін құралдарды дамыту. Antifraud Awards марапаты осы іске сүбелі үлес қосып жүргендердің еңбегін айшықтайды», – деді Ұлттық төлем корпорациясының Басқарма төрайымы Жанар Самаева.

Ұлттық Антифрод-орталығы 2024 жылы Ұлттық төлем корпорациясының жанынан құрылып, бірыңғай цифрлық алаңға банктерді, төлем және микроқаржы ұйымдарын, мемлекеттік органдарды, құқық қорғау құрылымдары мен байланыс операторларын тоғыстырды. Платформа қатысушылары күдікті операциялар туралы деректермен онлайн режимде алмасып, азаматтардың қаржылық шығынға ұшырауына дер кезінде тосқауыл қояды. Бүгінгі таңда жүйеге 270-тен астам ұйым мүше. 2026 жылғы 1 қыркүйектегі мәлімет бойынша, Антифрод-орталығының үйлесімді жұмысының арқасында 127 миллиард теңге көлеміндегі алаяқтық әрекеттердің жолы кесілді.

Анықтама:

Central Asia Fintech Summit (CAFS) 2026 – Орталық Азияның қаржы және технология секторларын біріктіретін, аймақтағы ең ауқымды әрі маңызды іс-шаралардың бірі. Шара цифрлық экономика мен қаржы нарығының болашағын талқылау үшін банк саласының топ-менеджерлерін, мемлекеттік сектор мен финтех-компаниялардың өкілдерін бір алаңға біріктіреді. Іс-шараны ұйымдастырушылар: Қазақстан Республикасының Ұлттық төлем корпорациясы, Kazakhstan Fintech Network, Қазақстан Республикасының Ұлттық Банкі.

Алматыдағы «Целинный» заманауи мәдениет орталығында үшінші жыл сайынғы Central Asia Fintech Summit (CAFS) 2026 өтті. Биылғы саммит «Сенім дәуірі: келесі онжылдықта қаржы нарығы қандай болады?» тақырыбымен өтіп, қаржы және технологиялық компаниялардың, реттеушілердің, мемлекеттік органдардың және сарапшылар қауымдастығының 4 000-нан астам өкілін біріктірді. Іс-шараға 15-тен астам елден сарапшылар қатысты

Іс-шараны ашқан Қазақстан Республикасы Ұлттық банкінің төрағасы Тимур Сүлейменов саммитті ұйымдастырушы – ҚР Ұлттық банкінің Ұлттық төлем корпорациясын 30 жылдық мерейтойымен құттықтап, оның қолма-қол ақшасыз экономиканы, төлем суверенитетін және елдің қаржы саласын дамытуға қосқан айрықша үлесін атап өтті.

Өз сөзінде Тимур Сүлейменов Қазақстанның қаржы нарығын дамытудың келесі кезеңін белгіледі.

«Цифрлық технологиялар қаржы нарығының құрылымын түбегейлі өзгерту үстінде: жаңа қатысушылар, инвестициялау құралдары мен есеп айырысу тәсілдері пайда болып жатыр. Сонымен қатар реттеушінің рөлі де өзгеріп келеді – бізден алдын ала әрекет етуді, инновациялар мен бәсекелестікке жағдай жасауды, сонымен бірге қаржы жүйесінің сенімділігі мен оған деген сенімді қамтамасыз етуді талап етеді», – деді ол.

Басты тезистердің қатарында Қазақстанда базалық цифрлық инфрақұрылым мен қажетті реттеу базасы қалыптасып болғаны атап өтілді. Ендігі кезек – осы мүмкіндіктерді нақты өнімдер, серіктестіктер мен жаңа бизнес-модельдер жасау үшін іс жүзінде қолдану.

Жаңа архитектура және нарықты кеңейту

CAFS 2026 басты тақырыптарының бірі Қазақстанның төлем нарығының жаңа архитектурасы болды. 2026 жылғы қазан айынан бастап реттелетін қатысушылардың жаңа түрі – бірінші санаттағы төлем ұйымдары туралы нормалар күшіне енеді. Олар Ұлттық банктің лицензиясы негізінде жұмыс істейді және төлем қызметтерін банктік операциялардың жекелеген түрлерімен ұштастыра алады.

Жаңа қатысушылардың келуі бәсекелестікті күшейтуге, транзакциялық шығындарды төмендетуге және жаңа қаржы өнімдерінің пайда болуына жағдай жасауға тиіс. Жаңа институтқа нарық қатысушылары, соның ішінде жаһандық ойыншылар тарапынан да қызығушылық артып отыр.

Цифрлық қаржы инфрақұрылымы іс жүзінде

Бүгінгі таңда Қазақстанда банкаралық төлемдерді, цифрлық теңгені, биометрияны және азаматтар мен бизнесті қаржылық алаяқтықтан қорғау құралдарын біріктіретін Ұлттық цифрлық қаржы инфрақұрылымының негізгі компоненттері жұмыс істеп тұр.

2026 жылдың басты нәтижелерінің бірі – Банкаралық мобильді төлемдер жүйесінің іске қосылуы. Ол іске қосылған сәттен бастап 19 шілдеден бері телефон нөмірі бойынша аударымдар мен Бірыңғай QR арқылы шамамен 400 млрд теңге сомасына 20 млн-нан астам транзакция жүргізілді.

Мемлекеттік қаржының цифрлық экосистемасына кезең-кезеңімен біріктіріліп жатқан цифрлық теңгені дамыту жалғасуда. 2026–2027 жылдары цифрлық теңге айналымы 2 трлн теңге деңгейінде болады деп күтілуде.

Цифрлық активтер нарығы да дамудың тағы бір бағытына айналды. Бүгінгі таңда реттеушілік құмсалғышта токенизация, стейблкоиндер, криптоплатеждер және кастодиальды сервистер саласындағы шешімдерді қоса алғанда, 34 жоба жүзеге асырылуда. Ұлттық крипторезервке $700 млн бөлінді. Алатау әкімдігімен бірлесіп, цифрлық активтер, төлемдер және токенизацияланған экономика саласындағы жобалар үшін икемді реттеушісі бар Crypto City іске қосуға дайындық жүріп жатыр.

Саммитте жасанды интеллектке (ЖИ) және оны қаржы жүйесінде практикалық қолдануға айрықша назар аударылды. ЖИ негізіндегі шешімдер қазірдің өзінде антифродта, валюталық бақылауда және қаржылық мониторингте қолданылуда. Атап айтқанда, Ұлттық Антифрод-орталығының ЖИ-аналитигі алаяқтық схемаларды тергеуді 80 есеге дейін жылдамдатуға мүмкіндік береді.

Қауіпсіздік – сенім негізі

Бағдарламаның маңызды әрі жарқын оқиғаларының бірі қаржы ұйымдары мен құқық қорғау органдарының қаржылық алаяқтыққа қарсы күрестегі бірлескен жетістіктеріне арналған National Antifraud Awards 2026 марапаттау рәсімі болды.

Бүгінгі таңда Ұлттық Антифрод-орталығы 270-тен астам қатысушының басын біріктіріп отыр. 2026 жылғы 1 қыркүйектегі жағдай бойынша орталықтың жүйелі жұмысының арқасында жалпы сомасы 127 млрд теңге болатын алаяқтық операциялардың жолы уақтылы кесілді.

Салтанатты шара барысында ұрланған қаражатты қайтару, алаяқтыққа қарсы күресте тиімді өзара іс-қимыл орнату, халықтың қаржылық сауаттылығын арттыру және Ұлттық Антифрод-орталығының жұмысын жетілдіру бағыттарында жоғары нәтиже көрсеткен қаржы ұйымдары мен полиция бөлімшелері арнайы марапаттарға ие болды

Жаңа серіктестіктер

Central Asia Fintech Summit 2026 аясында пікірталастар мен талқылаулардың нақты практикалық жалғасы нарық қатысушылары арасындағы маңызды жаңа уағдаластықтарға ұласты. Атап айтқанда, саммит барысында Қазақстанның қаржы және технологиялық нарықтарындағы ынтымақтастықты тереңдетуге және перспективалы жаңа жобаларды жан-жақты пысықтауға бағытталған Ұлттық банк пен Tether, сондай-ақ VEON компаниялары арасында тиісті меморандумдарға қол қойылды.

Бұдан бөлек, өңіраралық трансшекаралық төлем сервистерін сапалы дамыту жөніндегі жеке стратегиялық келісімге ҚР Ұлттық банкінің Ұлттық төлем корпорациясы мен Өзбекстан Республикасының «Ұлттық межбанктік процессингтік орталығы» АҚ (HUMO төлем жүйесінің операторы) ресми түрде қол қойды.

Жасалған келісімдер аясында тараптар ұлттық QR-кодтардың өзара эквайрингін жолға қоюды және азаматтарға банктердің бұрыннан үйреншікті мобильді қосымшалары арқылы екі ел арасында оңай трансшекаралық аударымдар жасауға мүмкіндік беруді жоспарлап отыр.

«Ұлттық төлем корпорациясы» АҚ Басқарма төрағасы Жанар Самаева атап өткендей, серіктестіктің негізгі мақсаты – төлем сервистері пайдаланушылар үшін қолайлы, қауіпсіз әрі ұлттық инфрақұрылымдар деңгейінде өзара үйлесімді болатын технологиялық жағдай қалыптастыру.

Өз кезегінде HUMO Басқарма төрағасы Александр Сотников бұл жобаның өңірдегі трансшекаралық төлем шешімдерін дамытудағы маңызды қадам екенін атап өтті.

Инфрақұрылымнан жаңа өнімдерге қарай

CAFS 2026 маңызды бөлігі жаңа технологиялық шешімдерді қолдау болды. Саммитте банктер, венчурлік қорлар мен технологиялық компаниялар өкілдері жобаларын бағалаған финтех-стартаптардың Fintech Stars Battle питч-сессиясының қорытындылары шығарылды.

Fintech Stars Battle 2026 жеңімпазы қауіпсіз онлайн-мәмілелерге арналған цифрлық платформа – SHART RATE жобасы атанды. Жоба White Hill Capital компаниясынан SAFE шарты бойынша $100 000-ға дейін инвестиция тарту мүмкіндігіне ие болды.

CAFS 2026 барысында белгіленген тағы бір стратегиялық бағыт – Қазақстанның қаржы индустриясының экспортын дамыту. Бұл отандық компаниялардың сыртқы нарықтарға шығуына да, халықаралық клиенттермен жұмыс істеу үшін қазақстандық юрисдикция мен инфрақұрылымды пайдалана алатын жаһандық ойыншыларды тартуға да қатысты.

Central Asia Fintech Summit 2026 саммиті Қазақстанның қаржы нарығы жаңа сапалы белеске көтерілгенін айқын көрсетті. Елде қажетті реттеуші орта мен базалық цифрлық инфрақұрылым толық орнықты. Ендігі басты басымдық – осы әлеуетті нақты іске асырып, жаңа ойыншылар мен өнімдердің пайда болуына, озық технологиялардың, халықаралық серіктестік пен жаңа бизнес-модельдердің қарқынды дамуына жол ашу.